Conserving and promoting colour varieties of the old traditional Welsh cattle

Newyddion Newyddion

Teyrnged i John Rees, Nant y Gwyrddail

P1040563

Gyda thristwch a sioc rwy’n cofnodi colli John o’n plith ar 29 Chwefror 2016.  Roedd John yn gyfaill parod iawn ei gymwynas bob tro roedd ei angen.  Fel tywysydd ym marchnad Dolgellau y des i’w adnabod gyntaf; a hynny yng nghwmni fy nhad a oedd yn adnabod tad John, Wmffre Nant y Gwyrddail.  Bu John yn selog iawn i farchnad Dolgellau dros y blynyddoedd, yn trefnu’r anifeiliaid ac yn eu llwytho yn rhwydd bob amser.

Roedd cymdeithas Gwartheg Hynafol Cymru yn rhan bwysig iawn o fywyd John.  Bu’n aelod o’r cychwyn cyntaf yn yr wythdegau.  Pan ymunais i gyda’r gymdeithas John oedd y Cadeirydd a’r Trysorydd ac roedd yn paratoi yn drylwyr iawn bob tro roedd cyfarfod.

Fel y Cadeirydd cyfredol anodd iawn yw hi i mi dalu’r deyrnged fach hon iddo, gan fy mod yn teimlo cryn hiraeth ar ei ôl.  O’i golli mor sydyn bydd bwrdd swyddogion y Gymdeithas â chadair wag arni unwaith eto eleni.  Gwelwyd colli John fis Medi diwethaf yn ein cyfarfod blynyddol gan nad oedd yn teimlo’n ddigon hwylus i ddod atom.  Mae’n siŵr gen i mai dyna’r cyfarfod cyntaf i John ei golli erioed.

Mae colli John yn gadael bwlch mawr i ni fel Cymdeithas.  Ond cofiwn am Marian ei bartner sydd yn ei hiraeth ar ôl un annwyl iawn.  Erys cofion da am un a roes ei orau i bob agwedd o’i fywyd. 

Geraint Rhyd-y-gof

Cadeirydd GHC

To top