Rydym yn falch iawn i gyhoeddi bod brîd Gwartheg Hynafol Cymru wedi’i dderbyn ar Restr Wylio Ymddiriedolaeth Goroesi Bridiau Prin (RBST). Mae yn y categori Blaenoriaeth, sy’n golygu bod angen cymorth brys arno i sicrhau ei fod yn goroesi.
Mae’r RBST yn gweithio i warchod a hyrwyddo bridiau cynhenid da byw a cheffylau y DU trwy amrywiaeth eang o gamau gweithredu gan gynnwys eu Rhestr Gwylio flynyddol o fridiau â Blaenoriaeth, Mewn Perygl a Bridiau Brodorol Eraill, eu Banc Genynnau Da Byw Cenedlaethol y DU, cwrs hyfforddi pori cadwraethol, ymgyrchu a gwaith polisi. Edrychwn ymlaen yn fawr at weithio gyda RBST i sicrhau dyfodol GHC.
Mae hyn yn ganlyniad i ddegawdau o waith caled gan ein bridwyr a’n haelodau, yn dyddio’n ôl i sefydliad y Gymdeithas – a, chyn hynny, i’r ffermwyr a oedd yn cadw’r gyrroedd hyn ar ffermydd mynydd anghysbell. Mae ein dyled yn fawr iddynt oll.
Daw cydnabyddiaeth RBST fisoedd yn unig ar ôl i’r Gymdeithas ddod yn elusen gofrestredig. Dylai’r ddau ddatblygiad hyn ein helpu i ddod o hyd i fwy o gymorth ac adnoddau yn ein gwaith i amddiffyn ein gwartheg bendigedig. Fel y gŵyr ein haelodau eisoes, mae gan anifeiliaid GHC lawer i’w gynnig i ffermwyr sydd eisiau gwartheg gwydn sy’n cynhyrchu cig blasus o laswelltir llai ffafriol. Mae hyn yn ychwanegol at gadw cysylltiad arbennig â diwylliant a hanes Cymru yn fyw.
Wrth i ni ystyried sut y gallwn wneud y defnydd gorau o’r cyfleoedd y mae cydnabyddiaeth RBST a statws elusennol yn eu cynnig, edrychwn ymlaen at barhau i hyrwyddo manteision niferus y brîd hanesyddol hwn sy’n ateb yr anghenion presennol am anifeiliaid mewnbwn isel.